မိုးရွာတဲ့နေ့တွေမှာ ပုံမှန်ထက် ပိုအိပ်ချင်တာမျိုး ဖြစ်ဖူးပါသလား။

သာမန်အားဖြင့် လူအများစုက မိုးအုံ့ပြီး မိုးရွာတဲ့အချိန်မှာ အိပ်ရာထဲမှာပဲ နေချင်တာ၊ တစ်ရေးတစ်မော အိပ်ချင်တာ၊ ဘာမှမလုပ်ချင်တာမျိုးတွေဖြစ်တတ်ပါတယ်။ ဒါပေမယ့် တစ်ခါတလေမှာတော့ ကျန်းမာရေးနဲ့ နေ့စဉ်နေထိုင်မှုပုံစံတွေကြောင့်လည်း ပင်ပန်းနွမ်းနယ်ပြီး အိပ်ချင်တာမျိုးလည်းဖြစ်နိုင်ပါတယ်။ ဒါဆို မိုးကြောင့်ပဲ အိပ်ချင်တာလား၊ ဒါမှမဟုတ် ကိုယ့်ခန္ဓာကိုယ်က ပိုပြီးဂရုစိုက်ပေးဖို့ လိုအပ်နေတာလား။

မိုးရွာတဲ့နေ့တွေမှာ ဘာကြောင့် အိပ်ချင်လာတာလဲ?

မိုးအုံ့တဲ့နေ့တွေမှာ နေရောင်ခြည်ရရှိမှု နည်းသွားတတ်ပါတယ်။ နေရောင်ခြည်က ကျွန်တော်တို့ရဲ့အိပ်ချိန်နဲ့ နိုးချိန်ကိုပုံမှန်ဖြစ်အောင် ကူညီပေးပါတယ်။ ဒါကြောင့် နေ့အလင်းရောင် နည်းလာတဲ့အခါ ခန္ဓာကိုယ်က ပိုပြီးအနားယူချင်လာပြီး အိပ်ချင်စိတ် ဖြစ်လာနိုင်ပါတယ်။

နေ့စဉ်နေထိုင်မှုပုံစံကလည်း အရေးကြီးပါတယ်။

တစ်ခါတလေ အိပ်ချင်တာဟာ မိုးရွာတာကြောင့်ချည်း မဟုတ်နိုင်ပါဘူး။ တခြားသောအခြေအနေတို့ကြောင့်လည်းဖြစ်နိုင်ပါသေးတယ်။ 

ဥပမာ -

* အိပ်ချိန်မလုံလောက်ခြင်း

* ရေမလုံလောက်စွာ သောက်ခြင်း

* အစားအစာ မမှန်ခြင်း

* အာဟာရမျှတအောင် မစားခြင်း

* အချိန်ကြာကြာ ထိုင်နေခြင်း

* နေရောင်ခြည် ထိတွေ့မှုနည်းခြင်း

* ဖုန်း၊ ကွန်ပျူတာ စခရင်တွေကို အချိန်ကြာမြင့်အောင် ကြည့်ခြင်း

စတဲ့နေ့စဉ်အလေ့အထလေးတွေက တစ်နေ့တာအတွင်း ကိုယ်ခံစားရတဲ့ အားအင်အပေါ် သက်ရောက်မှုရှိနိုင်ပါတယ်။

ဒါကြောင့် မိုးရွာချိန်ဖြစ်နေလည်း ...

လုံလောက်စွာ အိပ်ပါ

နေ့တိုင်း အိပ်ချိန်နဲ့ နိုးချိန်ကို ပုံမှန်ထားပေးပါ။ အိပ်ရေးဝဝအိပ်ခြင်းက ခန္ဓာကိုယ်နဲ့ စိတ်ကို လန်းဆန်းစေပါတယ်။

ရေများများသောက်ပါ

ရာသီဥတုအေးနေလည်း ရေလုံလောက်စွာသောက်ဖို့ မမေ့ပါနဲ့။

အာဟာရမျှတအောင် စားပါ

သစ်သီး၊ ဟင်းသီးဟင်းရွက်၊ ကောက်နှံအမျိုးမျိုးနဲ့ ပရိုတင်းဓာတ်ပါဝင်တဲ့ အစားအစာတွေကို မျှတအောင် စားပေးပါ။

ကိုယ်လက်လှုပ်ရှားမှုရှိပါစေ

မိုးရွာလို့ တစ်နေကုန် မလှုပ်မရှားမနေပါနဲ့။ အိမ်ထဲမှာ အကြောဆန့်တာ၊ လမ်းလျှောက်တာ၊ ပေါ့ပေါ့ပါးပါး လေ့ကျင့်ခန်းလုပ်တာတွေ ပြုလုပ်နိုင်ပါတယ်။

နေရောင်ခြည် ထိတွေ့မှုရှိပါစေ

ဖြစ်နိုင်ရင် နေ့ခင်းဘက်မှာ အပြင်မထွက်ဖြစ်ရင်တောင် အိမ်ပြတင်းပေါက်နားမှာ ခဏနေပြီး နေရောင်ခြည်ထိတွေ့မှုရှိအောင်နေပါ။

ဒါကြောင့် မိုးရွာတဲ့နေ့မှာ အနည်းငယ် အိပ်ချင်တာက စိုးရိမ်စရာ မဟုတ်ပါဘူး။ တစ်ခါတလေ ခန္ဓာကိုယ်က အနားယူဖို့ လိုအပ်နေတာ ဖြစ်နိုင်ပါတယ်။ ဒါပေမယ့် မိုးရွာတဲ့နေ့တွေသာမက နေ့တိုင်းလိုလို အလွန်အမင်း ပင်ပန်းနွမ်းနယ်နေတယ် ဆိုရင်တော့ မပေါ့ဆသင့်ပါဘူး။ လိုအပ်ပါက ကျန်းမာရေးစောင့်ရှောက်မှုပေးသူနဲ့ တိုင်ပင်ကြည့်သင့်ပါတယ်။ မိုးရွာတဲ့နေ့တွေမှာ အနားယူပါ။ ဒါပေမယ့် ကိုယ့်ကျန်းမာရေးကိုတော့ ဂရုစိုက်ဖို့မမေ့ပါနဲ့။

အထက်ဖော်ပြပါအကြောင်းအရာလေးတွေကိုလိုက်နာပြီး ကျန်းမာရေးကိုဂရုစိုက်ခြင်းဖြင့် မိုးရွာတဲ့နေ့တွေကို ကျန်းမာပျော်ရွှင်စွာဖြတ်သန်းလိုက်ရအောင် ။