ကလေးတစ်ယောက် ဉာဏ်ရည်ထက်မြက်ပြီး ကျန်းမာသန်စွမ်းဖို့ဆို နေ့လယ်စာမှာ အာဟာရဓာတ်တွေ မျှမျှတတ ပါဝင်ဖို့ အလိုအပ်ဆုံးပါပဲ။ ငယ်ငယ်တုန်းကတော့ ထမင်း၊ ပေါင်မုန့်တို့ကိုသာ အဓိကအနေနဲ့ ပမာဏများများထည့်ပြီး အားအင်ဖြစ်အောင် စားခဲ့ကြပေမဲ့ အခုခေတ်မှာတော့ အာဟာရဗေဒ အရ အရေအတွက်ထက် အရည်အသွေးက ပိုအရေးကြီးကြောင်း သိမြင်လာကြပါပြီ။ ပြီးတော့ ထမင်းဗူးတစ်ခုမှာ ထမင်းချည်းပဲ အများကြီးထည့်တာမျိုး မဟုတ်ဘဲ အသီးအရွက်နဲ့ ပရိုတင်းတွေ အချိုးကျကျ ထည့်သွင်းပေးဖို့လည်း အရေးကြီးလာပါတယ်။ ဒါကြောင့်မလို့ အုပ်ထိန်းသူမိဘတွေအနေနဲ့ ကလေးတွေအတွက် ချစ်ခြင်းမေတ္တာကို ဖော်ပြနည်းတစ်မျိုးဖြစ်တဲ့ ကျောင်းထမင်းဗူးထည့်ကြရာမှာ အာဟာရပြည့်စုံအောင် ဘယ်လိုပြင်ဆင်ထုပ်ပိုးပေးသင့်လဲဆိုတာ ဒီဆောင်းပါးလေးမှာ အဆုံးထိ ဖတ်ကြည့်လိုက်ပါ။

အင်အားဖြစ်စေတဲ့ ကာဗွန်ဟိုက်ဒရိတ်

ထမင်းမစားရရင် ဗိုက်မဝသလို ခံစားရတဲ့ ကလေးတွေရှိမယ်ဆို ထမင်းကတော့ မပါမဖြစ်ထည့်ပေးဖြစ်တဲ့ အဓိက ပါဝင်ပစ္စည်းပါပဲ။ အခုနောက်ပိုင်းမှာတော့ ထမင်းဖြူဆိုတာထက် ဆန်လုံးညို၊ ဝဥကြာဇံ တို့ကို ထည့်ပေးတာက်လည်း ဗီတာမင် B နဲ့ အမျှင်ဓာတ်တွေ ရရှိစေလို့ ထမင်းအစားထိုးအနေနဲ့ တစ်ခါတစ်လေ ထည့်သွင်းပေးသင့်တာပါ။ WHO ရဲ့ အဆိုအရလည်း သန့်စင်ထားတဲ့ ဆန်ဖြူထက် အမျှင်ဓာတ်ပါတဲ့ အစားအစာတွေက ကလေးကို ဗိုက်ပြည့်စေရုံတင်မကဘဲ အာရုံစူးစိုက်မှု ပိုကောင်းစေပါတယ်။ သွေးတွင်းသကြားဓာတ်ကိုလည်း မျှတအောင် ထိန်းညှိပေးပြီး တစ်နေ့တာလုံးအတွက် တက်ကြွလန်းဆန်းစေပါတယ်။ ဒါကြောင့် ထမင်းချည်းပဲ အဓိကထည့်နေကျဆိုရင် အာဟာရဓာတ်အစုံ ရဖို့နဲ့ အပြောင်းအလဲဖြစ်အောင် ဆန်ဖြူ၊ ဆန်ညို အရော သို့မဟုတ် နှံအမျိုးမျိုးကို ပြင်ဆင်ပေးနိုင်ပါတယ်။

ကြီးထွားသန်စွမ်းမှုအတွက် ပရိုတင်း

ကလေးတွေရဲ့ ဖွံ့ဖြိုးတိုးတက်မှုအတွက် ပရိုတင်းက အရေးကြီးတဲ့ အခြေခံအုတ်မြစ်ဖြစ်ပါတယ်။ အသင့်စား အသားလုံး၊ အသားပြားတွေထက် အိမ်မှာ သန့်သန့်ရှင်းရှင်း ချက်ပြုတ်ထားတဲ့ ကြက်သား၊ ကြက်ဥ၊ ငါး တို့ကို ဦးစားပေးထည့်ပေးသင့်တာပါ။ အသားအစားထိုးအနေနဲ့ရော၊ သက်သတ်လွတ်အနေနဲ့ရောဆို ပဲပြား၊ ကုလားပဲ စတဲ့ ပဲအမျိုးမျိုးတို့ကို ကျွေးနိုင်ပြီး ဒါတွေကလည်း အသားဓာတ်နဲ့ သံဓာတ်ကို အပြည့်အဝ ပေးစွမ်းနိုင်တာပါ။ ဒါကြောင့် ပရိုတင်းဓာတ်ဟာ ကလေးတွေရဲ့ ကိုယ်ခံအားစနစ်နဲ့ ခန္ဓာကိုယ်ကြီးထွားမှုအတွက် မရှိမဖြစ်လိုအပ်နေတာလည်း ဖြစ်ပါတယ်။

ရောဂါကာကွယ်ပေးတဲ့ ဟင်းသီးဟင်းရွက်

Johns Hopkins Medicine ရဲ့ ဆောင်းပါးတစ်ခုမှာ အရောင်အသွေးစုံတဲ့ အသီးအရွက်တွေမှာ ပါဝင်တဲ့ အာဟာရဓာတ်တွေက ကလေးတွေကို ဖျားနာမှုကနေ ကာကွယ်ပေးပါတယ်။ ဥပမာ ကန်စွန်းရွက်၊ မုန်လာဥနီ၊ ပန်းဂေါ်ဖီ တွေကို ကြော်ပေးတာ ဒါမှမဟုတ် ပြုတ်ပေးတာက ကလေးရဲ့ အမြင်အာရုံ၊ အသားရည်နဲ့ ကျန်းမာရေးအတွက် အထူးကောင်းမွန်စေတာပါ။ နောက်ပြီး သကြားပါတဲ့ မုန့်တွေအစား ဗီတာမင် C နဲ့ အမျှင်ဓာတ်ကို ရရှိစေတဲ့ သင်္ဘောသီး၊ သရက်သီး စတဲ့ ရာသီပေါ်သီးနှံတွေကို ထည့်ပေးပါ။ ဒါကြောင့် အခုခေတ် အာဟာရလမ်းညွှန်ချက်တွေမှာ တစ်နေ့တာ စားသုံးမှုရဲ့ ထက်ဝက်နီးပါးက ဟင်းသီးဟင်းရွက်နဲ့ သစ်သီးဝလံတွေ ဖြစ်သင့်တယ်လို့ ဆိုလာကြတာ ဖြစ်ပါတယ်။ 

ကျောင်းထမင်းဗူးဆိုတာ ထမင်းနဲ့ အသားငါးတွေ စုထည့်ထားတဲ့ ဗူးလေးဆိုတာထက် ကလေးရဲ့ ကျန်းမာရေး၊ အာရုံစူးစိုက်မှုနဲ့ အနာဂတ်အတွက် နေ့စဉ် ရင်းနှီးမြှုပ်နှံမှုတစ်ခုပဲ ဖြစ်ပါတယ်။ အရင်ကလို ထမင်းဖြူအများကြီးနဲ့ ဆီပြန်ဟင်းတွေနေရာမှာ အပေါ်မှာ ပြောပြသွားတဲ့ ကျန်းမာရေးနဲ့ညီညွတ်တဲ့ အစားအစာ အချိုးအစားတွေကို အစားထိုးလိုက်တာက ကလေးတွေကို ပိုမိုထူးချွန်စေပြီး ကိုယ်ခန္ဓာဖွံ့ဖြိုးမှုကိုလည်း အကောင်းဆုံး ပံ့ပိုးပေးနိုင်မှာပါ။